Pallas de sabugueiro: Reutilizables, ecolóxicas, sostibles, únicas e 100% galegas

Cal é a orixe das nosas pallas de sabugueiro? En Atalanta somos moi fans dos batidos e dos zumes de froita, pero a utilización das pallas dun só uso non vai coa nosa filosofía.

Traballamos, na medida do posible, con provedores de proximidade, madeira de produción sostible, acabados respectuosos co medio ambiente e diminuíndo a produción de residuos.

Empregamos unha parte da labra xerada ao tornear para embalar os nosos produtos, conseguindo así unha presentación moi persoal á vez que as pezas van moi protexidas dos posibles golpes no transporte. Deste xeito diminuímos a pegada ecolóxica e evitamos o uso de plástico.

No noso día a día propoñemos novos usos para a madeira creando obxectos versátiles. Habitualmente, a solución a estes retos está diante dos nosos ollos, como nos sucedeu coas pallas de sabugueiro.

Despois de refugar unha chea de propostas, realizar estudos e probas atopamos a solución ideal: empregar madeira de sabugueiro (sambucus nigra).

A materia prima coa que elaboramos as pallas de sabugueiro

O sabugueiro forma parte da cultura popular galega. Ata non fai moito era un arbusto case indispensable nas nosas casas debido aos seus usos culinarios e medicinais.

É abundante na nosa contorna e ten unha gran rexeneración anual, ideal para o noso propósito.

Unha das principais características das ramas do sabugueiro é o seu centro brando. De feito os nenos usábano para fabricar os seus propios «tira tacos» (os precursores das «cervatanas» feitas con bolígrafo Bic dos 80).

O proceso de produción das pallas de sabugueiro

Aproveitando esta característica singular do sabugueiro, na época de poda, recollemos as ramas co grosor adecuado e comezamos o proceso de produción das pallas de sabugueiro:

1. Cortamos.
2. Baleiramos o interior.
3. Eliminamos a cortiza.
4. Lixamos.
5. Curamos.
6. Esterilizamos.

Conseguimos así unhas pallas de sabugueiro que son únicas, reutilizables, ecolóxicas, sostibles e cunha materia prima 100% galega.

Por que son únicas nosas pallas de sabugueiro? Cada unha é diferente ás demais xa que están feitas a man respectando a forma da rama da cal proveñen.

Como son estas pallas de sabugueiro? Teñen 14 cm de longo, posto que é a distancia máis frecuente entre nós nun crecemento, e grosores que oscilan entre 9 e 14 mm.

As pallas de sabugueiro de Atalanta están dispoñibles na nosa tenda en liña nunha práctica bolsa de algodón orgánico cun cepillito para facilitar a súa limpeza. Ademais, nos nosos consellos de conservación podes atopar como coidalas para que te acompañen durante moitos anos.