A cabeceira da tenda en liña TOAST reza o seguinte:

“TOAST quere amosar un xeito de vida máis lenta, reflexiva e consciente poñendo en valor a artesanía, compartindo coñecementos e mellorando ás comunidades sobre as que actuamos coas nosas accións”.

Esta é a súa filosofía.

Con 20 tendas físicas repartidas por todo o Reino Unido e unha fantástica páxina web con tenda en liña, TOAST leva 20 anos colaborando con artesáns de diferentes partes do mundo (Xapón, India, Italia ou Escocia) para crear tecidos, e artigos para o fogar fermosos e orixinais. Nas súas coleccións prestan moita atención ós detalles, contando a historia que hai detrás de cada obxeto.

Na súa procura de novos produtos e propostas cruzáronse con nós e o crebanoces rouboulles o corazón!.

A nosa filosofía, o feito de traballar a madeira a través dun oficio tradicional coma o torneado, os deseños e a utilidade das nosas pezas, a súa sinxeleza, os seus acabados….todo encaixaba á perfección coas súas necesidades. Foi coma un  amor a primeira vista

Preparamos así una pequena tirada de crebanoces en freixo e bidueiro con destino ó Reino Unido.

Para o envío deseñamos unha embalaxe individual e específica con cartón ondulado e arame recuberto de papel.

Dende hoxe xa se poden mercar na súa tenda en liña. Un agasallo fermoso e útil perfecto para estas dastas de Nadal

Foi moi sinxelo e agradable traballar con eles. Agardamos desenvolver xuntos novos proxectos nos que amosar a beleza do sinxelo (a nosa teima no día a día).

O noso lema nas redes é “A beleza do sinxelo”. Cada vez que un novo proxecto ve a luz, non deixamos de sorprendernos de ver que sempre cumprimos coa nosa filosofía de traballo.

Unha das cousas que máis chamou a atención cando o ano pasado presentamos as artesas (este ano haberá novidades!), foi a transformación da súa tapa nunha bandexa.

O seu tamaño facíaa ideal para levar o pan á mesa, pero tamén para uns cafés, uns chupitos de licor, infusións ou unha pequena merenda con petiscos varios.

foi por iso que decidimos sacar a bandexa soa. Así xurdiu ABELEDA.

Bandexa Abeleda

Queriamos facer unha bandexa de madeira pintada a man con asas de coiro, pero atopar os motivos decorativos non foi doado. Buscabamos orixinalidade no debuxo, personalidade, sinxeleza nos trazos… Ao final atopamos a resposta, coma case sempre, na tradición: os esgrafiados da Ribeira Sacra.

O Val Sanvitorio
Xuvencos
A Lama S. Vitorio

Fotos: Mar López Sotelo

Unha antiga técnica de revoco con cal que se aplica aos muros exteriores dos edificios e que tiña finalidades arquitectónicas (reforzando os muros e evitando a humidade), decorativas (amosando os gustos de cada época), simbólicas(protección mediante cruces ou símbolos astrais), comunicativas (no caso das xerras queconvidaban a facer un alto camiño) e hixiénicas (pola propiedade antiparasitaria do cal).

Despois de estudar os distintos motivos que se empregaban nos esgrafiados decidimos polas virgulas ou gotas . Un patrón sinxelo e versátil que estampado sobre o azul elixido como fondo das bandexas, expresa, en boa medida, as nosas inquedanzas.

Cando comezamos a preparar as primeiras bandexas, a tan só un par de quilómetros do noso obradoiro (no lugar de “O Sol” na parroquia de Callobre), descubríronse uns esgrafiados nunha antiga ferrería ao pé da N-640 . Todo parece indicar que están emparentados cos da Ribeira Sacra como os que utilizamos para as nosas bandexas. Toda unha casualidade!

En Atalanta Madera encántannos os batidos e dos zumes de froitas pero o uso de pallas dun só uso non vai coa nosa filosofía.

Traballamos, na medida do posible, con provedores locais, madeira de produción sostible, acabados respectuosos co medio ambiente e redución da produción de refugallos.

Empregamos unha parte das labras de madeira xeradas ó tornear para embalar os nosos produtos, conseguindo así unha presentación moi persoal ao tempo que as pezas van moi protexidas de posibles golpes no transporte. Deste xeito reducimos a pegada ecolóxica e evitamos o uso de plástico.

No noso día a día propoñemos novos usos para a madeira creando obxectos versátiles. Normalmente, a solución a estes desafíos está ante os nosos ollos.

Despois de rexeitar moitas propostas, realizar estudos e probas, atopamos a solución ideal:

MADEIRA de SABUGUEIRO (Sambucus Nigra).

O saúco forma parte da cultura popular galega. Ata non hai moito era un arbusto case indispensable nas nosas casas polos seus usos culinarios e medicinais.

É abundante no noso medio e ten unha gran rexeneración anual, ideal para o noso propósito.

Unha das principais características das ramas de sabugueiro é o seu centro mol. De feito, os nenos usárono para facer os seus propios “tira tacos” (¡precursores das “cervatanas” feitas cos bolígrafos Bic dos anos 80!).

Aproveitando esta característica única do sabugueiro, no momento da poda, recollemos as pólas co grosor axeitado e comezamos o proceso de elaboración das pallas:

CORTAMOS

BALEIRAMOS O INTERIOR

Baleirando pallas de sabugueiro

ESTONAMOS

LIXAMOS

Lixando as pallas de sabugueiro

CURAMOS

ESTERILIZAMOS

Deste xeito conseguimos pallas únicas, reutilizables, ecolóxicas, sostibles e cunha materia prima 100% galega!

Todas son diferentes! xa que están feitas a man respectando a forma da póla da que proceden.

Miden 14 cm de lonxitude (esta é a distancia máis frecuente entre nós nun crecemento) e espesores que oscilan entre os 9 e os 14 mm.

Bolsa de algodón orgánico con pallas de sabugueiro

Están dispoñibles na nosa tenda online nunha práctica bolsa de algodón orgánico cun cepillo pequeno para facilitar a limpeza.

Para prolongar a súa vida útil, elaboramos os seguintes consellos de conservación .

Queres saber máis sobre o sabugueiro ?

Neste comezo de ano, moitos de vos teredes alguna das pezas Atalanta nas vosas casas. Mil grazas pola grande acollida que tiveron as nosas propostas de agasallos.

Imos adicar este primeiro post do ano a darvos uns consellos para coidalas e para que vos duren moito

As pezas que facemos son de bidueiro, freixo e faia e tamén de taboleiro mariño de bidueiro. Os consellos de conservación están condicionados polo material de cada peza así coma polo tipo de acabado aplicado.

Comezaremos a falar da artesa que foi, sen dúbida, a estrela do pasado Nadal. Moitos de vós rendédesvos aos encantos dunha peza que, ao tempo que nos lembra ás avoas que fan o pan, permítenos servilo na mesa.

Como saberedes os que xa a esteades disfrutando, está feita de taboleiro mariño e a tapa-bandexa ten as asas de coiro. Inclúe tamén unha pa de fariña de bidueiro que se remata cun verniz certificado para uso alimentario, igual que a artesa.

Imos cos consellos de limpeza e conservación:

A base da artesa pódese lavar con auga e xabón e unha esponxa suave como a pa da fariña. En canto á tapa da bandexa, ao ter asas de coiro, é recomendable limpala cun pano húmido, sen metela debaixo da auga corrente, para non danar o coiro nin os parafusos.

Estes consellos de conservación son tamén aplicables ós pratos e as táboas e, para que os teñades sempre á man, en Atalanta preparamos unhas fichas ben xeitosas:

PRATOS, TÁBOAS E CUNCOS

Feitas en bidueiro, faia, castiñeiro ou taboleiro mariño, comezan a formar parte do “fondo do armario” das vosas casas.

consellos para pratos, táboas e cuncos

CREBANOCES

Corpo de freixo e parafuso de bidueiro, esta peza é un clásico contemporáneo.

consellos para conservar un crebanoces de madeira

XABOEIRAS

Engadíronse ao noso catálogo o ano pasado. Están feitas en madeira ou taboleiro mariño de bidueiro e rematadas cun produto específico para o ambiente húmido do baño que permite que a madeira “respire”.

consellos para conservar as xaboeiras de madeira

ROLOS E ESPÁTULAS

Feitas en madeira de faia (os rolos) e de bidueiro (as espátulas), son un elemento práctico e imprescindible na cociña.

Ci¡onsellos para conservar rolos e espátulas de madeira

PALLAS REUTILIZABLES DE SABUGUEIRO

A proposta máis natural e biodegradable para substituír as dun só uso.

Consellos para conservas as pallas de sabugueiro

Despois dunha conversa no verán de 2020 con María de Maruxío (taller de galletas saudables) , xurdiu a idea de ofrecer aos nosos clientes propostas de agasallos artesanais, ricos, saudables e locais.

Así naceu o proxecto SuMaS

As propostas tamén debían cumprir coa filosofía de residuos cero, polo que todas as pezas que compoñían cada conxunto tiñan que ter, cando menos, unha segunda vida.

Con estas premisas, no outono dese mesmo ano saíron á luz os primeiros packs SuMaS.

Peneiras e niños de paxaro serviron de embalaxe para estas primeiras propostas

Estes primeiros packs tiveron unha grande acollida , polo que este ano decidimos repetir a experiencia incorporando novos obradoiros ao proxecto SuMaS.

Nesta segunda edición o fío condutor é a autosuficiencia e a versatilidade.

A tradición, a soberanía alimentaria e a importancia de saber o que comemos inspirounos.

Foto: Patricia Figueiras

A primeira proposta para este 2021 son os conxuntos Caaveiro e Callobre .

Conxunto Caaveiro
Conxunto Callobre

Nestes conxuntos a protagonista é unha artesa con alma urbana de dimensións aptas para calquera cociña moderna. O seu deseño permitiranos amasar dentro, empregala para levedar o pan ou gardalo unha vez cocido. A máis, a súa tapa extraíble permitiranos utilizala como bandexa.

O conxunto está composto por:

 

Como todos os artigos que elaboramos, a artesa e a pa teñen un acabado apto para o contacto cos alimentos o que facilita a súa limpeza e conservación.

Podemos escoller entre unha versión vegana con rebolos de avea e pastas de té con marmelada de sabugueiro (Callobre) ou larpeira con rebolos de abelá con pepitas de chocolate e pastas de té de anacardos con chocolate (Caaveiro)

A tapa da artesa é a base para outros 4 conxuntos de SuMaS:

Carballo e Landra

Nestes conxuntos, a bandexa de taboleiro mariño de bidueiro con asas de coiro de Elena Ferro vai acompañada de:

Podemos escoller entre unha versión vegana con rebolos de avea e pastas de té con marmelada de sabugueiro ( Carballo ) ou larpeira con rebolos de abelá con pepitas de chocolate e pastas de té de anacardos con chocolate ( Landra )

A bandexa está rematada cun verniz de calidade alimentaria que facilita a súa limpeza.

Lucenza e Outeiro

Nestes conxuntos, a bandexa de taboleiro mariño de bidueiro con asas de coiro de Elena Ferro vai acompañada de:

  • Prato e cunca de madeira de bidueiro
  • Crebanoces en madeiras de freixo e bidueiro
  • Mantel de cadros Vichy vermellos 100% algodón feito por Nobelo a nobelo
  • Rebolos de Maruxío

Podemos escoller entre unha versión vegana con rebolos de avea ( Outeiro ) ou larpeira con rebolos de abelás con chispas de chocolate ( Lucenza )

A bandexa está rematada cun verniz de calidade alimentaria que facilita a súa limpeza.

Os niños de paxaro repiten dentro das propostas de SuMaS 2021

Pintureiro e Bailadora

Son un regalo creativo, consciente do medio ambiente e saboroso.

Están feitos de taboleiro e conteñen rebolos de chocolate no seu interior.

Como están feitos en madeira crúa, sobre eles pódese debuxar, pintar… e coa axuda dunha sinxela alcaiata, colgar das árbores para que nela aniñen os paxaros.

Vai acompañado dun par de lapis de sabugueiro ( Pintureiro ) ou 2 trompos decorados a man ( Bailadora )

A última proposta son uns sinxelos agasallos de Nadal:

Mega galleta do Apalpador e bolas de Nadal
Turrón de chocolate vegano e bolas de Nadal

As ilustracións foron creadas por Aldara Rodríguez

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies