Despois dunha conversa no verán de 2020 con María de Maruxío (taller de galletas saudables) , xurdiu a idea de ofrecer aos nosos clientes propostas de agasallos artesanais, ricos, saudables e locais.
Así naceu o proxecto SuMaS
As propostas tamén debían cumprir coa filosofía de residuos cero, polo que todas as pezas que compoñían cada conxunto tiñan que ter, cando menos, unha segunda vida.
Con estas premisas, no outono dese mesmo ano saíron á luz os primeiros packs SuMaS.
Estes primeiros packs tiveron unha grande acollida , polo que este ano decidimos repetir a experiencia incorporando novos obradoiros ao proxecto SuMaS.
Nesta segunda edición o fío condutor é a autosuficiencia e a versatilidade.
A tradición, a soberanía alimentaria e a importancia de saber o que comemos inspirounos.
A primeira proposta para este 2021 son os conxuntos Caaveiro e Callobre .
Nestes conxuntos a protagonista é unha artesa con alma urbana de dimensións aptas para calquera cociña moderna. O seu deseño permitiranos amasar dentro, empregala para levedar o pan ou gardalo unha vez cocido. A máis, a súa tapa extraíble permitiranos utilizala como bandexa.
O conxunto está composto por:
- Artesa de taboleiro mariño de bidueiro (as asas de coiro son da artesá Elena Ferro )
- Pa de fariña de bidueiro
- Pastas de té e Rebolos de Maruxío
- Bolsa da compra estampada por Amorote Printing Workshop
Como todos os artigos que elaboramos, a artesa e a pa teñen un acabado apto para o contacto cos alimentos o que facilita a súa limpeza e conservación.
Podemos escoller entre unha versión vegana con rebolos de avea e pastas de té con marmelada de sabugueiro (Callobre) ou larpeira con rebolos de abelá con pepitas de chocolate e pastas de té de anacardos con chocolate (Caaveiro)
A tapa da artesa é a base para outros 4 conxuntos de SuMaS:
Carballo e Landra
Nestes conxuntos, a bandexa de taboleiro mariño de bidueiro con asas de coiro de Elena Ferro vai acompañada de:
- Prato de madeira de bidueiro pintado a man con follas de carballo e landras por Amorote Printing Workshop
- Mantel de cadros Vichy vermellos 100% algodón feito por Nobelo a nobelo
- Pastas de té e rebolos e Maruxío
Podemos escoller entre unha versión vegana con rebolos de avea e pastas de té con marmelada de sabugueiro ( Carballo ) ou larpeira con rebolos de abelá con pepitas de chocolate e pastas de té de anacardos con chocolate ( Landra )
A bandexa está rematada cun verniz de calidade alimentaria que facilita a súa limpeza.
Lucenza e Outeiro
Nestes conxuntos, a bandexa de taboleiro mariño de bidueiro con asas de coiro de Elena Ferro vai acompañada de:
- Prato e cunca de madeira de bidueiro
- Crebanoces en madeiras de freixo e bidueiro
- Mantel de cadros Vichy vermellos 100% algodón feito por Nobelo a nobelo
- Rebolos de Maruxío
Podemos escoller entre unha versión vegana con rebolos de avea ( Outeiro ) ou larpeira con rebolos de abelás con chispas de chocolate ( Lucenza )
A bandexa está rematada cun verniz de calidade alimentaria que facilita a súa limpeza.
Os niños de paxaro repiten dentro das propostas de SuMaS 2021
Pintureiro e Bailadora
Son un regalo creativo, consciente do medio ambiente e saboroso.
Están feitos de taboleiro e conteñen rebolos de chocolate no seu interior.
Como están feitos en madeira crúa, sobre eles pódese debuxar, pintar… e coa axuda dunha sinxela alcaiata, colgar das árbores para que nela aniñen os paxaros.
Vai acompañado dun par de lapis de sabugueiro ( Pintureiro ) ou 2 trompos decorados a man ( Bailadora )
A última proposta son uns sinxelos agasallos de Nadal:
- Mega galleta coa tradicional figura do Apalpador + bolas de Nadal decoradas .
- Turrón vegano + bolas de Nadal decoradas
As ilustracións foron creadas por Aldara Rodríguez
